Ушул жылдын май айынан баштап электр жарыгына болгон баа 26 тыйынга жогорулайт. Бул тууралуу энергетика министри Таалайбек Ибраев Жогорку Кеңештин Отун энергетикалык комплекси, жер казынасын пайдалануу боюнча комитетинин жыйынында айтты.
Маалыматка караганда 1 кВт саат электр энергиясынын баасы калк үчүн 1 сом 37 тыйын, ал эми өнөр жай керектөөчүлөрү үчүн 3 сом 49 тыйын болот.
“Тариф саясаты 2025-жылдан 2030-жылга чейин каралган. Мисалы, былтыр 11 тыйынга көтөргөнбүз. Быйыл инфляцияга байланыштуу май айынан баштап баа дагы жогорулайт. Учурда Каржы жана Экономика министрликтери менен бирге тарифти талкуулап жатабыз. Жарандар 1 кВт саат электр энергиясына 1 сом 11 тыйындан төлөсө, май айынан тарта 1 сом 37 тыйындан төлөйт. Ал эми өнөр жай керектөөчүлөрү үчүн азыр баа 3 сом 18 тыйынды түзсө, майдан тарта 3 сом 49 тыйын болот”, – деди Ибраев.
