Ат-Башы районунун Ак-Жар айылында карылар үчүн машыгуу борбору ачылды. “Улуу Муун” деп аталган борбор Эмгек социалдык камсыздоо жана миграция министрлигинин колдоосу менен уюшулуп, улгайган жарандарга кам көрүү максатын көздөйт. Аны менен катар эле алардын бош убактысын пайдалуу өткөрүүгө, ден соолугуна кам көрүүгө шарт түзүүгө, сергек жашоо мүнөзүн жайылтууга көмөк көрсөтөт.
Борбор 370 миң сомдук спорттук инвентарлар менен жабдылып, бир учурда 25 адам машыга тургандай шарттар каралган. Алсак чуркоочу жана йога жасоочу килемдер, укалоочу жана фитнес көнүгүүлөр үчүн жабдуулар, шахмат ойноочу шаймандар бар. Ал эми физикалык көнүгүүлөр атайын инструктордун коштоосу менен өткөрүлөт.
