Ала-Буга айыл аймагына караштуу Кош-Дөбө айылында жыл жаңыргандан бери гепатиттин А түрүнүн жаңы 21 учуру катталган. Булардын ичинен 11и мектеп окуучулары арасында, калган 10у айыл тургундары.
Нарын район аралык ооруларды алдын алуу жана мамлекеттик санитардык-эпидемиологиялык көзөмөлдөө борборунун Ак-Талаа району боюнча жетекчиси Эрлан Бекишовдун маалыматына караганда, илдет катталган аймакта бардык иш чаралар жүргүзүлүп жатканы менен илдеттин таралуусу токтой элек.
“Гепатиттин А түрү Кош-Дөбө айылында 2024-жылдын сентябрь айында катталып баштаган. Катталган учур көбөйүп, бейтаптардын 11и райондук ооруканада, калган 17 бейтап үйдө амбулатордук түрдө дарыланышкан. Булардын 23ү мектеп окуучулары болгон. Үй-бүлөлүк дарыгерлер тобунун кызматкерлери жеринде көзөмөлдөп, эл арасында илдетти алдын алуу, санитардык эрежелерди сактоо боюнча түшүндүрүү иштерин жүргүзүп жатат”, -деди Э.Бекишов.
